Unha doce despedida

 

E case sen decatarnos chegou a última sesión do Club de Lectura Papalibros. Tras tres lecturas, moitas charlas, obradoiros, flocos de millos, pasapalabras e recollidas de alimentos, poñemos punto e final as nosas xuntanzas neste curso 2025-2026.

Como ides comprobar nas fotos, o noso último encontro non nos deixou mal sabor de boca… todo o contrario! Gozamos dunha merendiña, ben merecida, por certo, mentres limos as respostas que María Canosa dou ás nosas preguntas.

Vémonos o curso que vén! Pasade bo verán e recargade pilas!

PASAPALABRA

 

Tal e como adiantamos fai uns días, levamos tempo enredados na creación dun Pasapalabra cooperativo sobre Microalgas entre os grupos 1 e 2 do Club de Lectura

Puxémonos o reto de chegar a 20 acertos, de 24 definicións en total. Credes que o conseguimos? Dádelle ao play para comprobalo!

PASAPALABRA MICROALGAS - CLUB DE LECTURA

E así nos despedimos da última lectura do curso!

Obradoiro de algas

 

A lectura de Microalgas espertou a nosa curiosidade polo mundo das algas. Así, como non podía ser doutro xeito, quixemos darlle respostas aos nosos interrogantes e contactamos con Arenaria para realizar un obradoiro sobre algas.

Resultou unha experiencia incrible: aprendemos sobre algas de xeito manipulativo e lúdico. Observamos, experimentamos, xogamos, tocamos, dialogamos…

Foi unha mañá moi divertida! Grazas por este obradoiro, estamos desexando contar con vós para o seguinte!

MICROALGAS

 

Levamos xa algunhas semanas sen pasarnos por aquí pero temos unha boa xustificación: comezamos a nosa terceira  e última lectura do curso.

Trátase dun cómic titulado “Microalgas: o mundo oculto”, de Xulia Pisón. As aventuras de Spirulina, Nanno, Wasto e Tom téñennos atrapados! Estamos desexando coñecer o final…

Mentres tanto, ademáis de gozar lendo e intercambiando opinións cos compañeiros/as, tamén estamos a crear un Pasapalabra. Sí, sí, como o da tele.

Nas últimas sesións os dous grupos de traballo escolleron diferentes palabras relacionadas co cómic e fixeron as súas definicións. Faltan uns detalliños pero dentro de moi pouco descubriredes o resultado.

Estamos de mudanza!

 

Sí, tal e como adiantamos no título desta entrada, o Club de Lectura cambia de aula. O noso novo fogar é moito máis pequeno e acolledor e nos aporta a tranquilidade necesaria para desconectar do mundo gozando coa lectura.

Para comezar a personalizar este novo espazo nada mellor que decoralo en relación a “O neno can”. Así, puxémonos en contacto coa muralista Laura Suárez e encargámoslle un mural para a nosa aula cunha temática clara: a infancia e os seus dereitos.

As nosas ideas e o seu talento e creatividade deron como resultado esta marabilla:

Moitas grazas, Laura! Un pracer coñecerte e gozar da túa arte!

Retos de Lectura Cooperativos

 

Seguimos coas sesións de traballo sobre “O Neno Can”. Posto que a proposta dos Retos de lectura tivo moi boa acollida e derivou en resultados moi positivos, esta semana fixemos unha nova rolda.

Nesta ocasión os retos eran cooperativos e tiveron dúas temáticas.

O Grupo 1 profundou sobre o capítulo 5 da nosa lectura e as actividades abordaron o tema da discapacidade e as barreiras sociais. Así, as alumnas de 6º EP convertéronse en guías dando instrucións únicamente verbais para recrear diferentes posturas de baile, adoptaron o rol de arquitectas e trataron de eliminar posibles barreiras arquitectónicas presentes no centro e, por último, crearon un acróstico coa palabra discapacidade. Compartimos con vos esta experiencia:

Por outra banda, o Grupo 2 puxo o foco no capítulo 4, no que Leila, unha nena de 12 anos, é obrigada a casarse cun home moito máis maior que apenas coñece. Partindo desta historia o alumnado de 5º EP comprobou se realmente coñecía os seus dereitos, xogaron co poder da palabra tentando adiviñar o que estaban a definir os seus compañeiros/as e crearon o acróstico de Valentía. Aquí vos deixamos imaxes da sesión:

A liña da reflexión

 

“O neno can”, sen dúbida, non deixa indiferente a ninguén. Vivir por un momento a vida dos diferentes protagonistas das historias de Fina Casalderrey e Francisco Castro, resultou moi abraiante.

Saber que hai nenos/as que se ven privados dos seus dereitos básicos fíxonos reflexionar sobre a nosa vida, todo o que temos e a que aspectos lles damos máis ou menos importancia.

A proposta para esta sesión foi crear unha “Liña da reflexión”, na que o alumnado se movía polo espazo en función de se estaba “de acordo” ou “en desacordo” con diferentes afirmacións.

“Os adultos sempre entenden aos nenos/as”  - Acordo ou desacordo?

“É mellor calar para evitar problemas” – Acordo ou desacordo?

“Unha mestra/e pode cambiar a vida dun neno/a” – Acordo ou desacordo?

Estos son algúns exemplos das afirmación escollidas. Unha actividade moi reveladora tanto para os nenos/as como para os adultos/as.

 

“O NENO CAN”

 

Xa fai uns días que comezamos a nosa segunda lectura do curso: “O neno Can”, de Fina Casalderrey e Francisco Castro.

Co obxectivo de reflexionar sobre os dereitos da infancia, levamos a cabo diferentes Retos de Lectura: inventar títulos, debuxar emojis, dar consellos, empregar a mímica… Mirade!

María Canosa, temos moitas preguntas para ti!

 

Na última sesión do Club de Lectura, e en relación co final de “As pombas de Bastián”, xurdíronnnos moitas dúbidas.

Quen é realmente Bastián? Foi todo un soño de Minia? Por que a autora escolleu estes nomes para eles?

Como non podíamos quedarnos coa intriga, decidimos gravar un vídeo con todas as nosas preguntas a María Canosa. Credes que obteremos resposta? Manterémosvos informados!

PREGUNTAS PARA MARÍA CANOSA - CLUB DE LECTURA

Flocos de millo para despedir "As Pombas de Bastián"

 

Comezamos o segundo trimestre poñendo punto e final á lectura de “As pombas de Bastián”. Fixémolo en grupo, compartindo cos compañeiros/as as impresións e reflexións sobre o final desta entrañable historia. Como non podía ser doutra maneira, seguimos a nosa tradición de acompañar esta charla con flocos de millo. Deixámosvos por aquí algunha foto… non é a nosa intención dar envexa! Sentímolo!

Por certo, a nosa opinión sobre o libro quedou escrita nunhas fermosas pombas de papel feitas a man. Con elas decoraremos o noso Club para ter sempre presentes a Minia e a Bastián, e o valor da amizade.

Un éxito de recollida!

 

O noso traballo de organización dunha Recollida de Alimentos tivo os seus froitos! O pasado martes 16 de decembro pasámonos polos puntos de recollida que creamos nas diferentes aulas e comprobamos con moita alegría a gran colaboración da nosa Comunidade Educativa.

Grazas a todos eles/as e ao esforzo e adicación do alumnado do Club de Lectura este Nadal poderá ser máis feliz e especial para moitas familias da nosa contorna.

Finalizamos este trimestre cun gran sorriso! Boas vacacións!

 

Recollida de alimentos

 Continuamos a aprender coa nosa primeira lectura do curso, “As Pombas de Bastián”. Unha das principais temáticas deste libro é a POBREZA, ilustrada a través da vida de Bastián, un vagabundo que só atopa axuda e unha mirada amiga en Minia, unha nena pequena.

Posto que este ano estamos a traballar no noso PDI de centro os Obxectivos de Desenvolvemento Sustentable, tivemos a idea de poñer o noso granciño de area para contribuir á “Erradicación da pobreza” e lograr a “Fame Cero”.

Inspirándonos na historia tan fermosa que estamos a ler, decidimos organizar no centro unha Recollida de Alimentos en colaboración coa Asociación Cáritas de Cee.

Posto que somos moitas mans a axudar, dividímonos as tarefas, que non foron poucas.

 

O Grupo 1 encargouse de elaborar o cartel informativo sobre a recollida. Tras moito esfrozo, este foi o resultado:

Unha vez elaborado o cartel, o Grupo 2 enfrontouse a outra gran misión: anunciar polas aulas a proposta, creando en cada unha delas un punto de recollida de alimentos. Superaron o reto con éxito, compartimos a proba:

           

Canto contan os PREXUÍZOS?

 Xa estamos inmersos na historia de Minia e Bastián. A gran e nada habitual amizade entre unha nena e un vagabundo estanos a dar moito que pensar. Tras reflexionar conxuntamente sobre os primeiros capítulos de “As pombas de Bastián”, puxémonos na pel da súa protagonista.  Así, tal e como Minia observa desde a súa fiestra ao seu futuro amigo, imaxinando como pode ser a súa vida… nós fixemos o mesmo.

Observamos a diferentes persoas, intentando adiviñar a que se dedican, os seus gustos, estados de ánimo… e démonos conta de que coincidimos en moitas opinións. Como pode ser? Que nos levou a pensar desa maneira? En que detalles centramos a nosa atención para dar as nosas opinións?

Tras un gran debate, descubrimos a verdadeira identidade dos personaxes do noso xogo e a comparamos coas nosas hipóteses.

Resultados: algún acerto pero a maioría da información dista moito da realidade. Isto levounos a reflexionar sobre os nosos PREXUÍZOS e o presentes que están no noso día a día.

Deixamos a continuación imaxes desta sesión cos dous grupos de traballo. 

PAPALIBROS 2025-2026

Hoxe, xoves 6 de novembro, damos inicio a unha nova aventura do Club de Lectura “Papalibros”. Este curso escolar contamos con 14 alumnos e alumnas dispostos a “soñar cos ollos abertos” e compartir tan máxica experiencia cos seus compañeiros/as un ratiño á semana.

O noso primeiro encontro dou moito de si!

Comezamos coñecendo e asinando as normas do Club, pois estamos a adquirir un compromiso que requerirá de amosar responsabilidade ao longo do curso.

Posteriormente abordamos a organización das sesións, saíndo escollido democráticamente como día de reunión o XOVES. Aproveitamos a ocasión para dividirnos en dous grupos de traballo e finalizamos cunha gran escolla “a cegas”: a nosa primeira lectura do curso, moi relacionada con noso PDI de centro sobre os Obxectivos de Desenvolvemento Sustentable.

María Canosa e a súa obra “As pombas de Bastián” acompañaránnos durante este primer trimestre. Estamos desexando comezar!

Grazas, Guille!

Pois sí, tal e como anuncia o título desta entrada… conseguímolo!

 

Guillelme Castillo Carballa,

autor do Inframundo, contestou as nosas preguntas! 

E non só iso, senón que ademáis nos

agasallou cunha nova que nos fai pensar que teremos unha próxima

 

lectura asegurada no noso Club.

Para saber de que se trata, teredes que ver o vídeo.

 

Non vos deixará indiferentes, prometémolo!

RESPOSTA AUTOR INFRAMUNDO

Ante isto só podemos dicir: GRAZAS, GUILLE, DE CORAZÓN!

 

Fíxonos moita ilusión a túa resposta e valoramos moitísimo

 o teu talento, a túa implicación e a túa amabilidade.

E con isto, pechamos o Club de Lectura deste ano! Vémonos á volta!

Preguntas ao autor

 

Xa a piques de rematar esta segunda e derradeira lectura do curso, nas

últimas sesións do Club “Papalibros” deixamos voar a nosa imaxinación e

creatividade. A nosa atención centrouse en debuxar aos principais

personaxes do Inframundo partindo das descricións físicas e de

personalidade que o autor recolle no libro.

Tras finalizar as nosas creacións, pensamos que tales obras de arte tiñan

que chegar a Guillelme, polo que nos puxemos en contacto con el,

aproveitando tamén para facerlle algunhas preguntas que nos foron

xurdindo durante este tempo.

Oxalá obteñamos resposta!

Compartimos por aquí o noso vídeo.

PREGUNTAS AUTOR INFRAMUNDO

Reconstruíndo o Inframundo

 Co obxectivo de avanzar na lectura e traballar a parte do libro que nos

tocaba esta semana, desenvolvemos unha actividade de escoita, atención,

comprensión e moito, moito traballo en equipo.

Cando chegamos á aula atopámonos con oito tarxetas que contiñan o

resumo de varios capítulos do Inframundo. O reto era claro: tratar de

ordenalas e secuencialas axeitadamente en 10 minutos.

Como podedes comprobar nas imaxes e nos vídeos, non se nos dou nada

mal e tivemos tempo de poñer en común e reflexionar sobre diversos

aspectos da trama. Estamos enganchados/as.

RECONSTRUÍNDO O INFRAMUNDO